නැඟෙනහිරට 2500යි / තදාසන්න පෙදෙස්වලට 50,000යි
ග්‍රාමීය අඩු ආදායම්ලාභීන්, වතු ප්‍රජාව මෙන්ම කොළඹ නාගරික ජනාවාස ආශ්‍රිත ජනතාව කෙරෙහි අවධානය යොමු කරමින් 2026 වසරේදී නිවාස 62,000කට අධික ප්‍රමාණයක් ඉදිකිරීමට රජය සැලසුම් කර ඇතැයි නිවාස ඉදිකිරීම් හා ජල සම්පාදන නියෝජ්‍ය අමාත්‍ය ටී.බී. සරත් මහතා පාර්ලිමේන්තුවේදී ඊයේ (11) ප්‍රකාශ කළේය. නියෝජ්‍ය අමාත්‍ය ටී.බී. සරත් මහතා මේ බව සඳහන් කළේ 2026 වසර සඳහා වන අය-වැය පිළිබඳ දෙවැනි වර කියැවීමේ විවාදයට එක් වෙමිනි.
2026 වසර සඳහා ඉදිරිපත් කරන ලද අය-වැය තුළින් අඩු ආදායම්ලාභීන්ගේ නිවාස අවශ්‍යතාව වෙනුවෙන් නිවාස 7,000ක් ඉදිකිරීම සඳහා මුදල් වෙන්කර ඇති අතර එක් නිවෙසකට රුපියල් ලක්ෂ 10 බැගින් වැය කරන බව ද හෙතෙම කීවේය.
වතු ජනතාව සඳහා ඒකක 2500ක් ඉදිකිරීමටත් කොළඹ නගරයේ තදාසන්න ප්‍රදේශවල නිවාස 50000ක් ඉදිකිරීමටත් මුදල් වෙන් කර තිබෙන බව ද හෙතෙම කීවේය.
කොළඹ විවිධ තදාසන්න ප්‍රදේශවල ජීවත්වන අඩු ආදායම් ලාභි ජනතාවට දැරිය හැකි පිරිවැයකට නිවාස මිල දී ගැනීම වෙනුවෙන් බිලියන 6.5ක් වෙන්කර තිබෙනවා. උතුරු නැ‍ඟෙනහිර ප්‍ර‍ෙද්ශවල ගෙවල් 2500ක් හදන්න ලක්ෂ 15 ගානේ වෙන්කර තිබෙනවා. එමෙන්ම පසුගිය අය වැයෙන්ද ඒ සඳහා මුදල් වෙන්කළ බවත් ඒ යටතේ ගම් මට්ටමින් නිවාස තුන්දහසක් ඉදිකළ බවත් ඒ මහතා පැවැසීය.
එහිදි වැඩිදුරටත් අදහස් දැක්වූ නියෝජ්‍ය අමාත්‍යවරයා මෙසේද පැවැසීය.
“නිවාස අමාත්‍යාංශ්‍ය ගත්තම ගිය අය වැයෙන් මිලියනය, ලක්ෂ දහය ගානේ දුන්නා. ලක්ෂ දහයෙන් ගෙවල් හදන්නේ කොහොමද කියලා විපක්ෂයේ මන්ත්‍රීවරු ඇහුවා. හදපු ගෙවල් තුන්දහසකට වඩා ලේඛනගත කරලා තිබෙනවා. දීපු නම, ලිපිනය ආදි සියලු විස්තර තිබෙනවා. හොයලා බලන්න පුළුවන්. ලක්ෂ දහයක් දීලා හදපු ගෙවල්වලට ලක්ෂ 15ක් 20ක් වියදම් කරලා තිබෙනවා.
උදව් කරන මිනිස්සු ඉන්නවා. ගමේ මිනිස්සු ගිහින් උදව් කරනවා. ව්‍යාපාරිකයෝ උදව් කරනවා. ගමක අසරණ මනුස්සයෙකුට ගෙයක් ලැබුණම හැමෝම උදව් කරනවා. අද ගෙවල් හදන එක ජාතික ව්‍යාපාරයක් වෙලා තිබෙනවා. අන්න එහෙමයි අපි ගෙවල් හැදුවේ. නමුත් 2015-2019 වකවානුවේ දී ඒ ආණ්ඩුව කයිවාරු ගහන මහත්තයාගේ ආණ්ඩුවේ ගෙවල් 64407ක්, ගම්මාන 2562ක් තුළ හදනවා කිව්වා. නමුත් ගෙවල් හදලා තිබෙන්නේ 16747ක් පමණයි. මේ ගෙවල්වලින් පදිංචි වී සිටින්නේ සියයට විස්සකටත් වඩා අඩු පිරිසක්. අනිත් ගෙවල්වල පදිංචිවී නැහැ. ඒ වගේම අලි ගහන කැලෑවල්වල තමයි ගෙවල් හැදුවේ. වනජීවී කලාපවල ගෙවල් හැදුවා. වනාන්තර ඇතුළේ ගෙවල් හැදුවා. පාරවල් නැහැ. එහෙම කෙනා තමයි ලංකාවේ ලොකුම සැලසුම් ශිල්පියා වගේ, බුද්ධිමතා වගේ කතා කරන්නේ. අපට හැම දිස්ත්‍රික්කයක් ඇතුළෙම පහුගිය කාලය තුළ ඉදිකරපු ගෙවල් සම්බන්ධයෙන් සංඛ්‍යාත්මක තොරතුරු තිබෙනවා.
2015 -2019 වකවානුවේදි ගෙවල් 4800ක ජනතාව තමන්ගේ ගෙවල්වලින් ඉවත් කර තිබෙනවා, අලුතින් ගෙවල් දෙනවා කියලා.
ස්වර්ණා විජේකෝන්, මහින්ද අලුත්ගෙදර, සන්ධ්‍යා කරුණාරත්න
✅✅✅✅✅✅✅