මෙරට මත්ද්‍රව්‍ය උවදුරේ බිහිසුණු යථාර්ථය හෙළිදරව් කරමින්, මෙම වසරේ ගතවූ මාස දහය හමාරක කාලය තුළ පමණක් මත්ද්‍රව්‍ය සම්බන්ධයෙන් අධිකරණ වෙත නඩු එක්ලක්ෂ අසූපන් දහස් අටසිය හැත්තෑ දෙකක් පවරා ඇති බව වාර්තා වෙයි.
මෙම සංඛ්‍යාලේඛන අතරින් වඩාත්ම භයානක තත්ත්වය පෙන්නුම් කරන්නේ ‘අයිස්’ මත්ද්‍රව්‍ය සම්බන්ධයෙනි. ඒ අනුව, වැඩිම නඩු ප්‍රමාණයක් වන නඩු 66,593ක් පවරා ඇත්තේ අයිස් මත්ද්‍රව්‍ය සම්බන්ධයෙනි. මෙම කාලය තුළ ආරක්ෂක අංශ විසින් අත්අඩංගුවට ගෙන ඇති අයිස් මත්ද්‍රව්‍ය ප්‍රමාණය කිලෝග්‍රෑම් 2539.5 ඉක්මවා තිබීම, එහි බරපතලකම මනාව පැහැදිලි කරයි.
ඊට අමතරව, හෙරොයින් මත්ද්‍රව්‍ය කිලෝග්‍රෑම් 1482.8ක් සමඟ සැකකරුවන් අත්අඩංගුවට ගෙන නඩු 58,130ක් පැවරීමට ආරක්ෂක අංශ සමත්ව තිබේ. කොකේන් මත්ද්‍රව්‍ය කිලෝග්‍රෑම් 32.6ක් අත්අඩංගුවට ගෙන ඇති අතර, ඊට අදාළව නඩු 91ක් ගොනු කර ඇත.
ගංජා සහ කේරළ ගංජා කිලෝග්‍රෑම් 14,434.4ක ප්‍රමාණයක් අත්අඩංගුවට ගෙන ඊට එරෙහිව නඩු 58,724ක් පවරා තිබේ. තවද, මත් පෙති ලක්ෂ 30ක් සහ මත් කරල් ලක්ෂ 6ක් සමඟ, ඒවා භාවිත කළ, අලෙවි කළ, ප්‍රවාහනය කළ සහ ළඟ තබාගත් පුද්ගලයින්ට එරෙහිව නඩු 2,808ක් ගොනු කර ඇත.
මෙම වසරේ ජනවාරි 01 වනදා සිට ඔක්තෝබර් 22 වනදා දක්වා කාලය තුළ දිවයින පුරා සිදුකළ වැටලීම් එක්ලක්ෂ අනූ එක්දහස් තුන්සිය විස්සක් (191,320) ඔස්සේ, මත්ද්‍රව්‍ය ජාවාරමට සහ භාවිතයට සම්බන්ධ පුද්ගලයින් එක්ලක්ෂ අනූදහස් නවසිය තිස් අටක් (190,938) සැකපිට අත්අඩංගුවට ගෙන තිබේ.
මෙම මත්ද්‍රව්‍ය වැටලීම්වලට සමගාමීව, ටී-56 ගිනි අවි, පිස්තෝල, රිවෝල්වර ඇතුළු නීති විරෝධී ගිනි අවි 2,097ක් ද ආරක්ෂක අංශ භාරයට ගෙන තිබීම, මත්ද්‍රව්‍ය ජාවාරම සහ සංවිධානාත්මක අපරාධ අතර ඇති සම්බන්ධය තවදුරටත් තහවුරු කරයි.
මෙම මෙහෙයුම් අතරතුර පුද්ගලයින් හැට එක් ලක්ෂ විසිහත් දහසකට (6,127,000) අධික පිරිසක් පරීක්ෂාවට ලක්කර ඇති බවද රජයේ වාර්තා වැඩිදුරටත් පෙන්වා දෙයි.