වල් පැළෑටියක් ලෙස බොහෝ දෙනා ඉවත දමන ඖෂධීය ගුණයෙන් ඉහළ “දිය බෙරලිය” ශාකය ගැනයි මේ සටහන.
අප පරිසරය නොයෙකුත් වටිනා ඖෂධ ශාකයන්ගෙන් පිරුණු ස්වභාවික ඔසු උයනකි. එහෙත්, නිසි දැනුමක් නොමැති කම නිසා අපගේ ගෙවත්තේ, කුඹුරු නියරේ හෝ ඉඩම්වල ඉබේ වැවෙන බොහෝ වටිනා පැළෑටි වල් පැළෑටි ලෙස සලකා ගලවා විනාශ කර දැමීම සුලබ දසුනකි.
තෙතමනය සහිත ඕනෑම පරිසරයක ඉතා පහසුවෙන් සහ සරුවට පඳුරක් ලෙස වැවෙන දිය බෙරලිය, දීප්තිමත් කොළ පැහැති, පළල් සහ මෘදු රැළි සහිත පත්‍රවලින් යුක්ත වේ. මෙහි කුඩා නිල් පැහැති මල් හටගනී. කිසිදු රසායනික පොහොරක් අවශ්‍ය නොවන මෙම ශාකය, බඳුනක වුවද තෙතමනය පවත්වා ගනිමින් පහසුවෙන් වගා කළ හැකිය.
දිය බෙරලිය වල ප්‍රයෝජන -:
01.ආහාරයක් වශයෙන්.
දිය බෙරලිය ශාකයට ඇත්තේ සිසිල් ගුණයකි. මෙය,අල හෝ පරිප්පු සමග ව්‍යංජනයක් ලෙස එසේත් නැත්නම් මැල්ලුමක් ලෙස වෙනත් පලා වර්ග සමග කලවම් මැල්ලුමක් ලෙස හෝ කොළ කැඳ ලෙස පිළියෙළ කර ගත හැක.
02.දියවැඩියාව සදහා.
රුධිරයේ සීනි මට්ටම මැනවින් පාලනය කරන නිසා දියවැඩියා රෝගීන්ට ඉතා හිතකරය.
03.ආමාශයේ රෝග සදහා.
අම්ල පිත්ත (ගැස්ට්‍රයිටිස්) රෝගය සුවපත් කරන අතර, ආමාශයේ නිරෝගී බව වර්ධනය කරයි. ශරීරයේ ඉදිමුම් තත්ත්වයන් ද සමනය කරයි.
04.වකුගඩු සහ මුත්‍රා රෝග සදහා.
මුත්‍රා ආශ්‍රිත රෝග සඳහා ඉතා ගුණදායක වන අතර, වකුගඩු ආබාධ සුවපත් කිරීමටද ඉවහල් වේ.
05.කාටිලේජ වර්ධනය සදහා.
ශරීරයේ කාටිලේජ වේගවත් වර්ධනයකට ලක් කිරීමේ විශේෂ හැකියාවක් පවතී.
06.අක්ෂි රෝග සදහා.
ඇස්වල ඇතිවන වේදනාවන් සමනය කිරීමට උපකාරී වේ.
නූතන පරම්පරාව අතරින් ගිලිහී යන, එහෙත් නිරෝගී ජීවිතයකට මංපෙන්වන මෙවැනි සාම්ප්‍රදායික ඔසු අප අවට පරිසරයෙන්ම පහසුවෙන් සොයාගත හැකිය. එබැවින්, ඔබත් නොදැනුවත්කමින් ගෙවත්තෙන් ගලවා ඉවතලන මේ වටිනා දිය බෙරලිය ශාකය, නැවතත් ඔබේ ආහාර වේලට එක් කරගන්න.
✅✅✅✅✅✅✅✅✅