ජාතික ආර්ථිකය ශක්තිමත් කිරීමට මහපොළොව සමඟ පොරබදන මලෛයගම් ජනතාවගේ ආර්ථික මෙන්ම සමාජයීය අයිතිවාසිකම්ද තහවුරු කිරීමේ වගකීම ඉටු කරන බව ජනාධිපති අනුර කුමාර දිසානායක සඳහන් කරයි.
වතු ජනතාවගේ දීර්ඝකාලීන ඉල්ලීමක් වූ රුපියල් 1750ක දෛනික වැටුප් ඉල්ලීම දිනා දීමට කෙසේ හෝ මෙම වසර තුළ කටයුතු කරන බව ජනාධිපති අනුර කුමාර දිසානායක සඳහන් කරයි.
වසර 202කට ආසන්න කාලයක් මහ පොළොව සමග පොරබදමින් මෙරට ජාතික ආර්ථිකය ශක්තිමත් කිරීමට දායකත්වය සපයන මලෛයගම් ජන ප්‍රජාවගේ ආර්ථික මෙන්ම සමාජයීය අයිතිවාසිකම්ද තහවුරු කිරීමේ වගකීම ඉටු කරන බව ජනාධිපතිවරයා අවධාරණය කළේය.
ජනාධිපති අනුර කුමාර දිසානායක මහතා මේ බව සඳහන් කළේ මලෛයගම් ජනතාවට නිවාස හිමිකම්පත් ලබා දීමේ අවස්ථාවට අද (12) පෙරවරුවේ බණ්ඩාරවෙල මහජන ක්‍රීඩාංගණයේදි එක් වෙමිනි.
මෙරට ඉතිහාසයේ පළමු වතාවට පසුගිය මහ මැතිවරණයේදී තම ඥාතීන් සහ අසල්වැසියන් පාර්ලිමේන්තුවට තෝරා පත් කර ගනිමින්, මලෛයගම් ජන ප්‍රජාව තැබූ අපේක්ෂා කිසිවිටෙකත් බිඳ වැටීමට ඉඩ නොතබන බව මෙහිදී අවධාරණය කළ ජනාධිපතිවරයා එම විශ්වාසය තවදුරටත් ශක්තිමත් කරමින් ඔවුන්ට හිමි ආර්ථික මෙන්ම සමාජ ජිවිතයද දිනා දීමට රජය කැපවී කටයුතු කරන බව සඳහන් කළේය.
එහිදී එම ජනතාවගේ සෞඛ්‍ය අයිතීන් දිනා දීම, පිරිසිදු පානීය ජලය ලබා ගැනීමේ අයිතිවාසිකම තහවුරු කිරීම මෙන්ම දරුවන්ට හොඳ අධ්‍යාපනයක් ලබාදීම සහ වතුකරයේ මත්ද්‍රව්‍ය ජාවාරම මැඬලීම කෙරෙහිද රජය සුවිශේෂී අවධානය යොමු කර තිබෙන බව ජනාධිපතිවරයා පැවසීය.
පොහොසත් රටක් – ලස්සන ජීවිතයක් ප්‍රතිපත්ති ප්‍රකාශය යතාර්ථයක් කිරීම උදෙසා හැටන් ප්‍රකාශනයට අනුව යමින් මලෛයගම් ප්‍රජාවගේ නිවසක් සඳහා වන අයිතිය තහවුරු කිරීමේ අරමුණින් ඉන්දු – ලංකා IV වන අදියරේ නිවාස 10,000ක වැඩසටහනේ ප්‍රතිලාභීන් 2000ක් සඳහා හිමිකම් පත්‍ර ලබාදීම මෙහිදී සංකේතාත්මකව ජනාධිපතිවරයා අතින් සිදු කෙරිණි.
කඳුකර ප්‍රදේශවල වතු ආශ්‍රිතව පදිංචිව සිටින මලෛයගම් ප්‍රජාවගේ ජීවන තත්ත්වය උසස් කිරීම මෙන්ම ආරක්ෂිත පරිසර හිතකාමී මූලික පහසුකම් සහිත නිවාස ලබාදීම මෙම ව්‍යාපෘතියේ මූලික අරමුණ වන අතර මෙම එක් නිවසක් සඳහා ඉන්දීය රජය විසින් රුපියල් ලක්ෂ 28ක මුදලක් සහ ශ්‍රී ලංකා රජය විසින් නිවසේ යටිතල පහසුකම් සඳහා රුපියල් ලක්ෂ 04ක මුදලක් වැය කර ඇත.
මෙම නිවාස ව්‍යාපෘතියට අදාළව සම්පාදනය කෙරුණු ග්‍රන්ථ කට්ටලයද මෙහිදී ජනාධිපතිවරයා වෙත පිළිගැන්විණි.
මෙරට ජනතාවට වඩා යහපත් ආර්ථික සහ සමාජයීය ජීවිතයක් ලබාදීම වෙනුවෙන් ඉන්දියානු රජය දක්වන සහාය වෙනුවෙන් ඉන්දියානු අග්‍රාමාත්‍ය නරේන්ද්‍ර මෝදිට, එරට ජනතාවට සහ එම කාර්යය ශ්‍රී ලංකාව තුළ මෙහෙයවන ඉන්දියානු මහ කොමසාරිස්වරයාට ස්තුතිය පළ කිරීමටද ජනාධිපති අනුර කුමාර දිසානායක මෙහිදී කටයුතු කළේය.
මෙම උත්සව සභාව ඇමතූ ජනාධිපති අනුර කුමාර දිසානායක සඳහන් කළේ,
“ශ්‍රී ලංකාව සහ ඉන්දියාව අතර තිබෙන දිගුකාලීන ඓතිහාසික සබඳතාවේත්, ඉන්දියාවත්, ඉන්දියානු ජනතාවත්, ශ්‍රී ලංකාව සහ ශ්‍රී ලංකාවේ ජනතාව කෙරෙහි දක්වන ළෙන්ගතුබවේත් සංකේතයක් ලෙස මෙම නිවාස ව්‍යාපෘතිය හැඳින්විය හැකියි.
අපි දන්නවා ඉන්දියාව සහ ශ්‍රී ලංකාව අතර දිගුකාලීන සබඳතාවක් තිබෙනවා. විශේෂයෙන් පසුගිය ආර්ථික බිඳ වැටීම හමුවේ ඉන්දියාව අපිට වශාල ලෙස සහාය ලබා දුන්නා. ඒ වගේම ආර්ථික අර්බුදයෙන් නිදහස් වීමේ ණය ප්‍රතිව්‍යුහගතකරණ වැඩසටනේදීද ඉන්දියාව අපිට ශක්තිමත් සහායක් ලබා දුන්නා.
ඒ වගේම අපේ රටේ ආර්ථිකය ස්ථාවර කර ගැනීම සහ ආර්ථිකය ඉදිරියට ගෙන යාම වෙනුවෙන් විශාල මූල්‍ය සහායක් අපිට ලබා දෙනවා. ආගමික ස්ථාන සඳහා සූර්ය බල ව්‍යාපෘති ක්‍රියාත්මක කිරීම, සාමාන්‍ය ජනතාවගේ ජිවන තත්ත්වය නගා සිටුවීම වෙනුවෙන් කිරි ආශ්‍රිත කර්මාන්ත සඳහා සහාය ලබාදීම ආදිය වගේම මලෛයගම් ජනතාව සඳහා නිවාස ඉදිකර ගැනීම සඳහාත් අපිට සහාය ලබා දෙනවා.
ණය ආධාරයක් ලෙස ලැබි තිබු අනුරාධපුර දුම්රිය මාර්ගයේ සංඥා පද්ධතිය ඉදිකිරීමේ ව්‍යාපෘතිය ආධාරයක් බවට පත් කිරීමට ඉන්දියානු අග්‍රාමාත්‍යතුමා මගේ ඉන්දියානු සංචාරයේදී එකඟතාව පළ කළා. ඒ නිසා අපේ රටේ ජනතාවගේ ආර්ථිකයත්, සමාජ ජීවිතයත් උසස් කර ගැනීම සඳහා ඉන්දියානු රජය දක්වන සහාය වෙනුවෙන් ඉන්දියානු අග්‍රාමාත්‍ය නරේන්ද්‍ර මෝදි මැතිතුමාටත්, ඉන්දියානු ජනතාවටත්, එම කාර්යය ශ්‍රී ලංකාව තුළ මෙහෙය වන ඉන්දියානු මහකොමසාරිස්තුමාටත් අපි ස්තූතිවන්ත වෙනවා.
අපේ රට තුළ මලෛයගම් ජන ප්‍රජාව සුවිශේෂ ජන කොටසක්. අපේ ආර්ථිකයේ ප්‍රබල වැඩකොටසක් මෙම ජනතාව විසින් ඉටු කරනවා. වසර 202කට ආසන්න කාලයක් මේ මහපොළොව සමඟ පොරබදමින් ජාතික ආර්ථිකය ශක්තිමත් කිරීම සඳහා ඔවුන් සුවිශේෂ මෙහෙයක් ඉටු කරනවා.
මීට වසර 202කට පෙර මෙම ජනතාව ශ්‍රී ලංකාවට එන ගමනේදීත් විශාල පිරිසක් තැනින් තැන විවිධ උපද්‍රව හේතු කර ගෙන මිය ගියා. සත්‍ය තත්ත්වය නම්, මේ වසර 202 පුරා ඔවුන් මිය යමින් ජිවත් වෙනවා. ඒ නිසා එම ජනතාවගේ මූලික අවශ්‍යතා ඉටු කර දෙමින් සැපවත් ජිවිතයක් ලබා දීමට ආණ්ඩුවක් ලෙස අපිට විශාල වගකීමක් පැවරී තිබෙනවා. එහිදි අපි ක්ෂේත්‍ර කිහිපයක් කෙරෙහි අවධානය යොමු කර තිබෙනවා.
මේ රටේ කිසිදු බිම් අඟලක් හිමි නැති ජන ප්‍රජාවක් අපි අතර ජිවත් වෙනවා. එම ජනතාවට ඉඩමක සහ නිවසක හිමිකම ලබා දීම රජයක වගකීමක්. අපි එම කාර්යය ඉටු කිරීම සඳහා වූ වැඩපිළිවෙළක නිරතව සිටිනවා.
ඒ වගේම, තමන්ගේ ජිවිතය පවත්වාගෙන යාම වෙනුවෙන් සාධාරණ වැටුපක් ලබා දිය යුතුයි. දිගුකාලයක් පුරා රුපියල් 1750ක වැටුපක් මෙම ජනතාව ඉල්ලමින් සිටිනවා. අප කුමන ආකාරයකින් හෝ මෙම වසර ඇතුළත එම හිමිකම ලබා දීමට කටයුතු කරනවා. ඒ වගේම අපේ රටේ මන්දපෝෂණය, සෞඛ්‍ය අනාරක්ෂිතභාවය වැඩිම මලෛයගම් ජන ප්‍රජාව තුළයි.
ඒ නිසා සෞඛ්‍ය ගැටලු කෙරෙහි අපි විශේෂ අවධානය යොමු කර තිබෙනවා. වතු ආශ්‍රිත රෝහල් රජයට පවරා ගැනීම, අවශ්‍ය වෛද්‍යවරු සහ කාර්ය මණ්ඩල යොමු කිරීම මෙන්ම ඖෂධ ලබා දීම කෙරෙහි අපි අවධානය යොමු කර තිබෙනවා. ඒ නිසා ඔබේ සෞඛ්‍යය සුරක්ෂිත කිරීමේ රජයේ වගකීම ඉටු කරන බවට අපි ඔබට සහතික වෙනවා.
ඒ වගේම පුරවැසියන්ට පිරිසිදු පානීය ජලය ලබා ගැනීමේ අයිතිය අපි තහවුරු කළ යුතුයි. වර්තමාන රජය ඉදිරි වසර කිහිපයෙහි ප්‍රමුඛතාව ලබා දෙන්නේ පුරවැසියන් වෙත පිරිසිදු පානීය ජලය ලබා දීමේ ව්‍යාපෘති සඳහායි. ඒ වෙනුවෙන් එළැඹෙන අයවැයෙන් වැඩි මුදලක් වෙන් කිරීමට අපි අපේක්ෂා කරනවා.
මේ ජන ප්‍රජාව මුහුණදී තිබෙන චක්‍රීය දුගීභාවය පිළිබඳ ප්‍රශ්නයෙන් ගොඩ ඒමේදී අධ්‍යාපනය එක් ප්‍රධාන මෙවලමක් වෙනවා. අධ්‍යාපනය සහ දුප්පත්භාවය අතර විශාල සබඳතාවක් තිබෙනවා. ඒ නිසා ජනතාව දුගීභාවයෙන් මුදා ගැනිමේදී අධ්‍යාපනය වැදගත් සාධකයක් වෙනවා. ඒ නිසා වතු ආශ්‍රිත පාසල්වල ඇති වී තිබෙන බිඳ වැටීම් අපි අධ්‍යයනය කර තිබෙනවා. සෑම දරුවෙකුටම තමන්ගේ භාෂාවෙන් අධ්‍යාපනය හැදෑරීමේ අයිතිය අපි තහවුරු කළ යුතුයි.
ඒ වගේම මානසික නිදහස ඉතා වැදගත් වෙනවා. ජීවත්වීමට නිවසක්, ආදායම් මාර්ගයක්, හොද සෞඛ්‍ය සම්පන්න ජීවිතයක්, දරුවන්ට අධ්‍යාපනය, මානසික සුවය ඕනෑම පුරවැසියෙකුගේ මූලික අයිතිවාසිකම් වෙනවා. ඒ වෙනුවෙන් අපි වැඩ කරමින් සිටිනවා.
අපේ රටේ මලෛයගම් ප්‍රජාවට සංස්කෘතිකමය සහ සමාජයීය වශයෙන් ඔවුන්ට හිමි ගරුත්වය සහ පිළිගැනීම අඩු මට්ටමක පවතිනවා. ඒ නිසා සෑම ජනතාවකගේම සංස්කෘතික අයිතිවාසිකම්වලට හිමි විය යුතු ගෞරවය, අනන්‍යතාව සහ වටිනාකම ලබා දෙන සමාජයක් නිර්මාණය කිරීමට අපේ රජය දැඩි අවධානයකින් කටයුතු කරනවා.
සෑම සංස්කෘතියකටම හිමි අනන්‍යතාවට ගරු කරන සහ එම අනන්‍යතාව සතුරුභාවයේ සංකේතයක් නොවන නව සමාජයක් අපි නිර්මාණය කළ යුතුයි. ඒ නිසා මෙම ප්‍රජාවට ලබාදිය යුතු ආර්ථික ජිවිතය ලබා දීමත්, ඔවුන්ට හිමි සමාජ ජීවිතය ලබා දීමත් යන අරමුණු දෙක වෙනුවෙන්ම අපි කටයුතු කරමින් සිටිනවා.
මලෛයගම් ප්‍රජාව දශක ගණනාවක් පුරා තෝරා ගත් දේශපාලන ව්‍යාපාර තිබුණා. පරම්පරා ගණනාවක් පුරා දේශපාලන කඳවුරු කිහිපයක් සමග කටයුතු කළා. එහෙත් පළමු වතාවට පසුගිය මහ මැතිවරණයේදී එම පැරණි දේශපාලන කඳවුරු ප්‍රතික්ෂේප කර නව ගමනක් කෙරෙහි විශ්වාසය තබමින් නව අපේක්ෂා සහිතව අපේ රජය බලයට පත් කර ගැනීමට විශාල වෙහෙසක් දරමින් කටයුතු කළා.
පළමු වතාවට මලෛයගම් ප්‍රජාව නියෝජනය කරමින් සහෝදර, සහෝදරියන් ගණනාවක් ජාතික දේශපාලන ව්‍යාපාරයට පත් කර එවුවා. පළමු වතාවට ඔබගේ ඥාතියා, අසල්වැසියා පාර්ලිමේන්තුවට එවුවා. එය ලංකා දේශපාලනයේ විශාල පරිවර්තනයක්. ඔබ අප කෙරෙහි තැබූ විශ්වාසය බිඳකින්වත් බිඳ වැටීමට ඉඩ නොදී එම විශ්වාසය ශක්තිමත් කරමින් ඉදිරියට ගෙන යාමේ වගකීම අපි ඉටු කරනවා.
ඒ වගේම මේ ප්‍රදේශවල මත්ද්‍රව්‍ය උවදුර අවසන් කරමින් අපේ දරුවන් මත්ද්‍රව්‍යවලින් බේරා ගැනීමට අපි එක්ව කටයුතු කරමු. අපි එම ව්‍යසනය අවසන් කළ යුතුයි. අපි ඒ සඳහා තැබූ පියවර කිසිසේත් පසුපසට තබන්නේ නැහැ.
අල්ලස සහ දූෂණය අවසන් කිරීමට අපි ඉතා ශක්තිමත් පියවර රැසක් ගෙන තිබෙනවා. මෙම ක්‍රියාමාර්ගවලට එරෙහිව යන දේශපාලනය අනතුරුදායකයි. මේ කෙරෙහි අවබෝධයෙන් අපි කටයුතු කරමු. ඒ වගේම ආර්ථිකයේ ඉදිරි පිම්මක් ගැනීම වෙනුවෙන් අපි වැඩසටහන් රැසක් ක්‍රියාත්මක කර තිබෙනවා. මෙම ආර්ථික ජයග්‍රහණ සාමාන්‍ය ජනතාව අතරටද ගලා යා යුතුයි. ඒ වෙනුවෙන් අවශ්‍ය වැඩපිළිවෙළද අපි ක්‍රියාත්මක කරනවා.
අපි ඔබට එකඟ වූ බොහෝ කරුණු තිබෙනවා. එම එකඟතා ඉටු කිරීමේ බර අපේ දෙවුර මත පවරාගෙන අපි වැඩ කරනවා. අපිට විශාල විශ්වාසයක් තිබෙනවා අපේ රට තිබුණු තත්ත්වයෙන් ඉතා සාර්ථක ලෙස ඉදිරියට ගෙන ආ හැකියි කියලා. ඒ වගේම ජනතාවගේ ජීවන තත්ත්වය උසස් කළ හැකියි කියලා. ඒ වෙනුවෙන් අපි සියලු දෙනා එක්ව වැඩ කරමු කියා මම ඔබට ආරාධනා කරනවා.”
✅✅✅✅
.