ශ්‍රී ලංකාවේ සංවිධානාත්මක අපරාධකරුවෙකු ලෙස දකුණු පළාත කේන්ද්‍ර කරගනිමින් විවිධ විශමාචාරයන්ට සම්බන්ධ ‘රොටුඹ අමිල’ නැමැත්තා දැනට රුසියාවේදී අත්අඩංගුවට පත්ව එරට ආරක්ෂක අංශ භාරයේ පසුවුවද, ඔහුව මෙරටට භාරදීම තාවකාලිකව ප්‍රමාද වනු ඇති බව උසස් පොලිස් නිලධාරියෙක් අනාවරණය කළේය.
රුසියාවේ ආගමන විගමන නීති උල්ලංඝනය කිරීම සම්බන්ධයෙන් ඔහුට එරෙහිව එරට අධිකරණයක විභාග වන නඩුව අවසන් වන තුරු, ‘රොටුඹ අමිල’ ශ්‍රී ලංකාවට පිටුවහල් නොකරන බව රුසියානු බලධාරීන් දැනුම් දී තිබේ.
‘රොටුඹ අමිල’ නොහොත් අමිල ප්‍රසන්න හෙට්ටිආරච්චි, දකුණු පළාත කේන්ද්‍ර කරගත් සංවිධානාත්මක අපරාධ රැසක ප්‍රධාන සැකකරුවෙකි. මත්ද්‍රව්‍ය ජාවාරම, මනුෂ්‍ය ඝාතන, ඝාතන තැත් කිරීම්, කප්පම් ගැනීම් සහ තවත් බරපතල අපරාධ ගණනාවකට ඔහු සෘජුවම සම්බන්ධ බවට පොලිස් වාර්තාවල දැක්වේ.
විශේෂයෙන්ම, ‘මාකඳුරේ මධුෂ්’ගේ සමීපතමයෙකු ලෙස සැලකෙන ඔහු, මධුෂ්ගේ ඝාතනයෙන් පසු දකුණේ පාතාලයේ බලය තහවුරු කර ගැනීමට උත්සාහ කළ ප්‍රධාන චරිතයක් ලෙස ආරක්ෂක අංශ හඳුනාගෙන තිබිණි.
මීට පෙර අවස්ථා කිහිපයකදීම අත්අඩංගුවට පත්ව බන්ධනාගාරගතව සිටි ‘රොටුඹ අමිල’, ඇප මත නිදහස්ව සිටියදී රටින් පලා ගොස් තිබුණි. 2019 වසරේදී, බන්ධනාගාර බස් රථයකට වෙඩි තබා ‘සමයං’ ඇතුළු පිරිසක් ඝාතනය කිරීමේ සිද්ධියට අදාළව ද ඔහු ප්‍රධාන සැකකරුවෙකු විය. මෙරටින් පලා යාමෙන් පසුව, ඩුබායි සහ අනෙකුත් මැදපෙරදිග රටවල සැඟවී සිටිමින්, ඔහු සිය මත්ද්‍රව්‍ය ජාලය සහ අපරාධ කල්ලි දුරස්ථව මෙහෙයවූ බවට බුද්ධි අංශ වෙත තොරතුරු ලැබී තිබිණි.
ජාත්‍යන්තර පොලීසිය විසින් නිකුත් කරන ලද රතු නිවේදනයකට අනුව, පසුගිය මාර්තු මාසයේදී රුසියානු ආරක්ෂක අංශ විසින් ‘රොටුඹ අමිල’ව අත්අඩංගුවට ගන්නා ලදී. ඔහුව අත්අඩංගුවට ගන්නා අවස්ථාවේ තවත් කිහිප දෙනෙකු ඔහු සමඟ සිට ඇති බවට තොරතුරු ඇතත්, ඔවුන් පිළිබඳව මෙතෙක් කිසිදු නිල දැනුම්දීමක් මෙරටට ලැබී නොමැත. ‘රොටුඹ අමිල’ට එරෙහිව රුසියානු අධිකරණයේ විභාග වන නඩුව, ලබන මාසයේදී නැවත කැඳවීමට නියමිතය.
මේ අතර, අපරාධ පරීක්ෂණ දෙපාර්තමේන්තුව සඳහන් කරන්නේ, ‘රොටුඹ අමිල’ මෙරටට ගෙන්වා ගැනීමේ නිල ක්‍රියාවලිය මේ වන විටත් ආරම්භ කර ඇති බවත්, ඔහුට එරෙහි චෝදනා සහ අනෙකුත් සියලුම අවශ්‍ය තොරතුරු රුසියානු බලධාරීන් වෙත යොමු කර ඇති බවත්ය. රුසියානු අධිකරණ ක්‍රියාවලිය අවසන් වූ වහාම ඔහුව මෙරටට පිටුවහල් කරවා ගැනීමට අවශ්‍ය රාජ්‍ය තාන්ත්‍රික කටයුතු සිදු කරමින් පවතින බවද වාර්තා වේ.
✅✅✅✅✅